કેવી અજબ-ગજબની અને વિચિત્ર આ દુનિયા છે !…

Digital Recycling

Digital Recycling (c) myarttoinspire.com

“ ખૂબ મોટી-મોટી કંપનીઓ (ફેસબૂક, ગૂગલ, માઈક્રોસોફ્ટ, યાહૂ, ટ્વિટર, લિન્ક્ડઇન, ફોરસ્કવેર વગેરે વગેરે..) સમગ્ર વિશ્વને ડિજીટલી જોડી પોતાને સૌથી ‘આધુનિક, સ્વચ્છ અને સજ્જન’ તરીકે ઓળખાવે છે. એટલાં માટે કે તેમની પાસે ગંજાવર ડેટા સાચવતા સેન્ટર્સ છે. જ્યાં…

દર સેકન્ડે કરોડો લોકો લાખો ડિજીટલ ડિવાઈસીસ (કોમ્પ્યુટર્સ, કેમેરા, ટીવી)દ્વારા પોતાની વર્થ લાગતી પર્સનલ માહિતીઓ, વ્યર્થ લાગતાં ફોટોગ્રાફ્સ, ચેટિંગ દ્વારા થયેલી અર્થહીન વાતચીતો, ક્યારેય બીજીવાર જોવાનો સમય ન મળે એવા નકામાં વિડીયોનો કચરો ઠાલવતાં જ રહે છે. એ કારણે કે…જેનાથી જાહેરાત કરવા માંગતી બીજી કંપનીઓને તેમાં આવેલી માહિતીઓનો કચરો વેચી શકાય.

હવે એવા સોર્સથી એ જાહેરાતી કંપનીઓ પોતાના ડિજીટલ ડિવાઈસીસ (કોમ્પ્યુટર્સ, કેમેરા, ટીવી) હજુ વધારે વેચે છે. ને પછી તેના દ્વારા એ જ વર્થ લાગતી પર્સનલ માહિતીઓ, વ્યર્થ લાગતાં ફોટોગ્રાફ્સ, ચેટિંગ દ્વારા અર્થહીન વાતચીતો, ક્યારેય બીજીવાર જોવાનો સમય ન મળે એવા નકામાં વિડીયોનો હજુ વધારે કચરો પેદા કરે છે.!!!!!!!!! ”

હૈ ના…ઘૂમતી હૈ દુનિયા, બસ ઘૂમાનેવાલા ચાહિયે……ટુના ટુના…ટા ટા ટુના!

-(slashdot.org પર ક્યાંક વાંચેલું)

Advertisements

સર્ચ-એન્જીનનું નવું બાળક:|) ફેસબૂક ગ્રાફ-સર્ચ (|:

Facebook_Graph_Search-Intro


૧૫મી જાન્યુઆરી ૨૦૧૩ની તારીખ:
ઈન્ટરનેટ સર્ચ-ટેકનોલોજીમાં થયેલી વધુ ગંજાવર, વધુ મહાકાય ઇનોવેશન માટે ઇતિહાસ લખી ગઈ છે.

અત્યાર સુધી આપણે સર્ચમહાધિરાજ ગૂગલાચાર્યને વંદન કરતા આવ્યા છે. પણ એનાથીયે વધુ મજબૂત ડગલો પહેરી કાંઈક વધારે ડગલાં ભરી ફેસબૂકે એમાં દોડ આરંભી દીધી છે. 

લગભગ અઠવાડિયા અગાઉ તેના સર્જક માર્ક ઝુકરબર્ગે મીડિયાના કાનમાં હળી કરી કે…

“ગાંવ વાલો, દિલ ઠામ કર બૈઠો. ૧૫ જાન્યુઆરીકો હમારે યહાં કુચ ઐસા પકને વાલા હૈ જો દેખકર આપ ઉંગલીયાં દબાયે જાઓગે. જો અભી તક નેટ ઇતિહાસમેં ઐસા નહિ હુવા હૈ વહ હોનેવાલા હૈ.” – 

અને બંધુઓ, સાચે જ એણે સર્ચ ટેકનોલોજીમાં એવું કરી બતાવ્યું છે. – તદ્દન નવી અને ક્રિસ્પી ગ્રાફ-સર્ચ ટેકનોલોજી જન્માવીને….

જરા સરળ ભાષામાં માંડીને વાત કરું…

સામન્ય રીતે આપણે વિવિધ સર્ચ એન્જીન પર પીનથી લઇ પિયાનોથી થઇ પ્લેનેટ સુધી અગણિત શબ્દો, વિષયો અને ટૂંકા સવાલો પર સર્ચ કરતા રહીએ છીએ, ખરુને?

જ્યારે ફેસબૂકની આ ગ્રાફ-સર્ચ ટેકનોલોજી સ્પેસિફિક સવાલ દ્વારા પેદા થઈ છે…જેમ કે:

•()• “મારા એવા કયા દોસ્તો જે હજુયે માત્ર ૧૯૮૦નું ફટફટીયુ ચલાવે રાખે છે?”…

•()• “એવા કયા માણસો જે એક સપ્તાહ અગાઉ જોબ છોડી આવ્યા છે, ને હાલમાં સાવ નવરાં ધૂપ છે?”…

•()• “મારા ફ્રેન્ડઝ ગ્રુપમાં એવી કઈ છોકરીયુઓ…(આહ ! મસ્ત ક્વેરી છે!) જેમને ભેલપૂરી ને ચણા મમરા બૌ ભાવે છે?”… 

•()• “એવા સગાં-વ્હાલાઓ કોણ છે જેમણે થોડાં અરસા પહેલા કોઈ પ્રોપર્ટી ખરીદી છે?…. (અને હાળું અમને જણાવ્યુંએ નથી યાર!)”

•()• “કયા દેશમાં એવા મહાપુરુષો છે જેઓ (પાણી બચાવવા) ‘હાડા તૈણ’ મહિના સુધી તેમની શુદ્ધ ‘જીન્સ’ પણ ધોતા નથી?”….

•()• “મારી કઈ કઈ ‘ગર્લફ્રેન્ડઝો’ હાલમાં ઈંગ્લીસના ક્લાસો ભરે છે?…(યેસ! મારેય ‘ત્યાં જઈ ભરવા’ છે એટલે પૂછ્યું) 

•()• “કયા ટાબરીયાંવ ૧૫માં વર્ષેય હજુ બરેલીનું તેલ મમ્મી પાસે લગાડાવી કોલેજમાં (‘તેલ લેવા’) જાય છે?…

•()• “મારા શહેરમાં હાલમાં કઈ બ્લડ-બેંકમાં ‘ઓ-નેગેટીવ’ લોહી પીવાઈ રહ્યું છે?…” (આઈ મીન લેવાઈ રહ્યું સમજવાનું હોં)

વગેરે….વગેરે….જેવા અસંખ્ય નસ-ખેંચું પ્રશ્નો ઉદ્ભવતા હોય તો આ ગ્રાફસર્ચ ચિત્રો અને માહિતીઓના આલેખ સાથે સેકન્ડ્સમાં તમારી સમક્ષ પીરસી દેશે. 

જો કે ફેસબૂકનું આ બાળક હજુ ધાવણું છે. પણ ‘ગૂગળનું દૂધ’ પીતા નેટ-બાળકોને પરીઓની જેમ મોટા થતા વાર લાગી છે?

ઇન શોર્ટ, | સવાલ તમારો…જવાબ અમારો. બસ ત્યારે તમતમારે…કરો મારો! |

આ લિંક પર જોઈ લ્યો એ ડીલીવર્ડ થયેલા મીની-મહાકાય બાળકની વિશેષ વિગતો.

https://www.facebook.com/about/graphsearch

.

ખૂબ ઊંચા નામ અને દામ કમાયા બાદ થોડી ‘બદ’નામ થયેલી…ઇન્સ્ટાગ્રામ !

Instagram_Logo

(C) Instagram.com

આ રેપની ઘટના તો શું બની છે કે..યોગાનુયોગ એવાં જ સંલગ્ન સમાચારો બનતા-મળતા રહે છે. ને આપણે રેપ-અપ કરતા રહીએ છીએ. એવી જ એક રેપીડ વાત સોશિયલ મીડિયાના વેપારી આલમમાં વાઈરસની જેમ આ પાછલાં બે દિવસમાં આવીને વહી ગઈ.

=•= ઇન્સ્ટાગ્રામ.કૉમ : ૧ બિલિયન ડોલર્સ (અત્યારના ભાવે રૂપિયા ૫૪૬ અબજ ૬૦ કરોડ માત્ર)માં ફેસબૂકે ખરીદેલી કંપની. (પેપર પર) ઓફિસીયલી દેખાવમાં માત્ર ૭૦૦ મિલિયનનું કેશ વ્યવહાર.

=•= કામ: સ્માર્ટ-મોબાઈલ/પેડબૂક થી ફોટો લઇ એનું વિવિધ રંગોમાં ફિલ્ટરિંગ કરી દુનિયા સાથે શેર કરવાનો સોફ્ટવેર ચલાવવાનું.

=•= ઘણાં સમય પહેલાનું સ્ટેટસ?: અલબત્ત દુનિયાની સૌથી મોંઘી ખરીદાયેલી બાળક કંપની હતી.

=•= ગઈકાલનું સ્ટેટસ?: સોશિયલ મીડિયા થકી તેના પર તેના કહેવાતા ‘ફેન્સ/યુઝર્સ’ દ્વારા થયલો ‘ગેંગ બળાત્કાર’.

=•= કારણ?: એની પોલીસી, ટર્મ્સ અને કન્ડિશનમાં માત્ર એક વાક્યમાં ચેડાં કરવામાં આવ્યા.

=•= ચેડાંની ચોખવટ: “જુઓ, તમે સૌએ બહુ મોટી સંખ્યામાં અમારી ઇન્સ્ટન્ટ સાઈટ થકી ફોટો પાડ્યા છે. એટલે અમે એ પડેલા ફોટોઝને ચાહિયે એને વેચી શકીએ છીએ. કોઈ અમને એમ કરવાથી રોકી શકે નહી. ઉપરાંત અમારા સર્વર પર સેવ થયેલા ફોટોઝને અમે તમને પૂછ્યા વિના એડવર્ટાઈઝીંગ એજન્સીઓને વેચી કે વહેંચી શકીએ છીએ. વગેરે…વગેરે…વગેરે.”

=•= ફેન્સ લોકોનો ડિફેન્સ: ઇન્સ્ટાગ્રામના ધડાધડ એકાઉન્ટ્સ બંધ, સર્વિસ પર સોશિયલ મીડિયા દ્વારા થું થું, અને ‘સે નો ટુ ઇન્સ્ટાગ્રામ’ બળવા સાથે પ્રતિ ડીજીટલ બળાત્કાર.

=•= અત્યારનું, હાલનું, સ્ટેટસ: પોતાના સૌ ફેન્સ, યુઝર્સના ઘૂંટણિયે પડી માફી માંગી તેના ફાઉન્ડરે ચોખવટ કરી છે કે…

“માઈ-બાપ, અમને માફ કરો. ભલેને ફેસબૂક અમારો પિતાશ્રી હોય. છતાં હવેથી અમે આવી ભૂલ ક્યારેય નહિ કરીએ. અમે જાણીએ છીએ કે તમે સૌની ફિલ્મ સાથે અમારી પણ ‘ફિલ્લમ અને ઈજ્જત ઉતારી’ શકો છો.

મોરલો:

કેટલીક કંપનીઓને આ રીતે પણ પોતાની ‘ઔકાત જોવા માટે’ આવા (અ)ખતરા લે છે. શું કરીએ? નગ્ન અને સત્ય બંને સમયે બહાર તો આવે જ છે.

સરપંચ:

પોટાના કપરામાં સૌ નાગા….બાવા! આ જોઈ લ્યો એનું સોજ્જું ‘ઉદાર’હરણ

કરો અહીં…અથશ્રી ફેસબૂક કથા!

સવાલ એ છે કે: ફેસબૂકને બ્રાન્ડિંગ કરવાની શી જરૂર?

પણ ના…એનું માર્કેટ ભલેને નાનું લાગતું હોય કે મોટું થઇ રહ્યું હોય…અરે! બલ્કે પોતે ખુદ મહા-માર્કેટની જેમ સર્જાઈ ગયું હોય. તો પણ કોઈક ને કોઈ રીતે ‘બ્રાન્ડિંગ’ થતું રહે એ પ્રોડક્ટ અથવા સર્વિસની મોટી જરૂરીયાત છે.

બહુ હો..હા કર્યા વગર ૨ ઓગસ્ટથી ફેસબૂકે પોતાનું એક નાનકડું પોર્ટલ સ્ટાર્ટ કર્યું છે.

http://www.facebookstories.com/

* તમારી ઝિંદગીમાં ફેસબૂકનો કેટલો ફાળો છે?-

* એનાથી તમારી ઝિંદગીમાં એવી કેવી ઘટના સર્જાઈ કે જે તમને સૌથી આશ્ચર્યજનક લાગી હોય?-

એવી ખુશહાલી (!) ભરેલી ઘટનાઓ જેમ કે..

– (ડી.એન.એ ટેસ્ટ વિના) અથવા વર્ષો પહેલાના કુંભમેળા દરમિયાન તમારું ખોવાયેલું બાળક ફેસબૂક પર મળી આવ્યું હોય…

– વધુ પડતાં સ્ટેટસ અપડેટને લીધે તમારું બૈરું પિયરે ચાલ્યું ગયું હોય…

– ઓછાં સ્ટેટસ અપડેટને લીધે તમારી મેમરી-લોસ્ટ થઇ ગઈ હોય ને તમને ‘ગજિની રોગ’ લાગુ પડ્યો હોય…

– જેને ટગરટગર જોઈને જ ક્લાસ ભર્યા હોય એવી માધ્યમિક શાળામાં રહેલી ‘પેલી’ પિંકીની અચાનક ફ્રેન્ડ-રિક્વેસ્ટ આવી હોય…

જેવી (અ) સામાન્ય બાબતોને તો ઉજાગર કરવા આ સાઈટ ખોલવામાં આવી છે. એટલે હવે જો એવી કોઈ હટકે કથા સર્જાઈ હોય તો આપ સૌ ફેસબૂક ભક્તજનોને તેની સ્તુતિ કરવા માટેનું આ મોકળું મેદાન છે ભ’ઈ !

ટૂંકમાં એમનું કહેવું એમ છે કે…

“અબ હમારે મુંહ સે હી હમ હમારે ગૂણગાન ક્યોં ગાયે!..આપ હી કુછ કહે દીજીયે!”

વેપાર વિસ્મય: ૬૦ સેકન્ડ્સમાં ઈન્ટરનેટની વેપારિક દુનિયામાં શું શું બને છે?

60_Seconds

પ્રોગ્રામિંગ-કોડિંગની ખૂબ ઝડપથી વિકસતી ટેકનોલોજી વડે બનતી ઘટનાઓનું એનાલિસીસ કરવું દિવસે દિવસે આસાન બનતું જાય છે. પહેલા વાર્ષિક…પછી માસિક…તે બાદ દૈનિક… ત્યાર પછી કલાકિક અને હવે રિયલ-ટાઈમ આંકડા મળે છે. આજે ઈન્ટરનેટ એવી સ્થિતિમાં છે કે…લેવાતા શ્વાસને પળવારમાં (સેકન્ડ્સમાં) નેટ પર વાઈરસની જેમ ફેલાવી શકાય છે. એનું સચોટ ઉદાહરણ એટલે ટ્વિટર-ફેસબુક અને ગૂગલ પ્લસની વોલ (ડીજીટલ દિવાલ). પણ આ સાથે સાથે બીજા કેટલાંક માધ્યમો વિકસીત થઇ રહ્યાં છે. જે નાનકડા ખૂણે કે મોટકડા મેદાને કોઈક રીતે અલગ અલગ સેવા કે વસ્તુને વિકસાવવામાં મદદરૂપ થાય તેવા છે.

દોસ્તો, આજે થોડી એવી માહિતીઓ શેર કરવી છે. જેમાં શબ્દોની પાછળ રહેલી સંખ્યાઓ કાંઈક એવા સિક્રેટ્સ કહી જાય છે. જેની મદદથી આપણને કોઈક એવા પ્રોજેક્ટ, વિચાર-આઈડિયાને વિકસાવવા મદદરૂપ થઇ શકે. જેમ કે…આ ૬૦ સેકન્ડ્સમાં….

  • ૧૬૮,૦૦૦૦,૦૦ જેટલાં ઈ-મેઈલ્સની આપ-લે થઇ જાય છે…એટલે ‘ઈ-મેઈલજોલ’ રાખવા માટે આ બાબત ઘણી કામની છે. (જોકે આમાં મેલ-ફિમેલની માહિતી પર વધારે અભ્યાસ ચાલુ છે.)
  • ગૂગલદાસના સર્ચએન્જીનમાં લગભગ..૬૯૪,૪૪૫ સમસ્યા-ક્વેરીઝ-સવાલો પૂછવામાં આવે છે…જેનો જવાબ મળે છે ત્યારે પહાડમાંથી સોય શોધી કાઢી હોય એમ લાગે છે. (એક નવા નવા પહોંચેલા પટેલ સાહેબે લખ્યું કે Free Food  Hotels in USA. ત્યારે પરિણામ મળ્યુ કે ‘ગુજરાતી છો?’)
  • વાઈકીપેડીયા (ઈન્ટરનેટ વિશ્વકોષ) પર એક નવો આર્ટિકલ સર્જાય જાય છે અને દોઢેક આર્ટિકલ્સ અપડેટ થઈ જાય છે. (તમારી પાસે કોઈક ખાસ માહિતી હોય તો મોકળું મેદાન આજે જ બનાવી લ્યો…)
  • ફેસબુક પર ૬૯૫,૦૦૦ જેટલાં તો સ્ટેટ્સ અપડેટ્સ થઈ જાય છે.. જેમાં ૭૯, ૩૬૪ જેટલી વોલ-પોસ્ટ્સ લખાઈ જાય છે…અને ૫૧૦,૦૪૦ જેટલી કોમેન્ટ્સ મારવામાં આવે છે….(આમાં ‘લે હું તો લખી લખીને આ નવરી પડી…એવો મેસેજ પણ લખવામાં આવે છે…)
  • ટ્વિટરસાહેબ ૩૨૦થી વધારે નવા એકાઉન્ટ્સ બનાવે છે ને તેના દ્વારા લગભગ ૧ લાખ જેટલાં ટ્વિટર સંદેશાઓ મોકલવામાં આવે છે….(આમાં ‘ઓહ! આ પાંચમી વાર ‘જવું પડ્યુ’ છે.’ એ પણ ગણી લેવાનું હોં!)
  • લિન્ક્ડઇન નામની સુપર કારકિર્દી-વેપાર વિકાસ માટેના પ્લેટફોર્મ પર ૧૦૦થી પણ વધું નવા લોકો પોતાની પ્રોફાઈલ નોધાવે છે. (ઓહો…ઓહો પ્રોફેશનલ તકોની ભરમાર છે એમાં ભગિની-બંધુઓ, તમે ત્યાં છો ને?)
  • ૫૦થી વધારે નવા પ્રશ્નો ‘યાહૂ આન્સર’ પર પૂછવામાં આવે છે. (“તમારો શું સવાલ છે?– આ પણ એક સવાલ છે…)
  • ફ્લિકર નામની ફોટોગ્રાફ્સ સંગ્રહ કરતી Cool સાઈટ પર ૬,૬૦૦ નવા નરમ-ગરમ ફોટોઝ ઉમેરવામાં આવે છે.
  • ગૂડ-લૂકિંગ ટમ્બલર’ પર ૨૦,૦૦૦થીયે વધું નવા બ્લોગાલ્બમ સર્જાય છે.
  • ૧૫૦૦થી પણ વધુ બ્લોગ-પોસ્ટ્સ પ્રકાશિત થાય છે. જેમાં ૬૨ જેટલાં નવા બ્લોગ્સનું સર્જન પણ આવી જાય છે…(કેટલાંક જબરદસ્ત માહિતીઓથી ને કેટલાંક જબરદસ્તીથી મારવામાં આવેલી માહિતીઓથી)
  • ૭૦થી વધુ ડોમેઈન નામ રજિસ્ટર્ડ થાય છે…(યાર..હવે તો દાળભાત.કોમ પણ રજીસ્ટર્ડ છે રે!)
  • યુટ્યુબ પર ૬૦૦થી વધારે નવા વિડીયો ઉમેરવામાં આવે છે….જે એવરેજ ૨૫ કલાક સુધી જોઈ શકાય. (હવે તમેજ કહો કે…આપણા એકલાની ફિલ્મ થોડી ઉતરતી હોય છે..આતો ગામ આખાની વાત થઇ!!)
  • આઈ-ફોનમાં ૧૩,૦૦૦થી વધુ એપ્સ’ ડાઉનલોડ થઇ જાય છે. જેમાં ‘ગેમ્સ’ સૌથી વધુ ભાગ ભજવે છે.
  • હાયલા…૩ લાખ સિતેર હજાર જેટલી મિનીટોની વાતચીત એકલા સ્કાય્પ પરથી થાય છે. (આમાં સ્ત્રીઓ કેટલી હશે એ વિશે વધારે રિસર્ચ ચાલુ છે)….

આ સિવાય બીજી ઘણી એવી અગણિત માહિતીઓનો ‘પહાડ’ આ ૬૦ સેકન્ડ્સમાં ભ‘રાઈ’ રહ્યો છે. જે વિશે થોડાં નવા અંદાઝમાં આવનારા પોસ્ટ્સ પર જાણવા મળવાનું છે.

હવે તમને આ બધાં રિસોર્સનો ઉપયોગ કરવાની જરાયે જરૂર નથી…આ તો એ લોકો માટે લખવામાં આવ્યું છે જેમને કાંઈક વેપાર કરવો છે…જેને પોતાની કારકિર્દી બનાવવી છે. ને જે લોકો ભારતની બહાર ‘કાંઈક’ હટકે કરવા નીકળ્યા છે….બાકી પાનનો ગલ્લો, ચાહની કીટલી, દિલ્હીનું ઈટાલી, રામલીલા મેદાન કે અકબર રોડ….ક્યાં દૂર છે?

પહેલા સરપાવ: લખાયેલી આ આખી દેશી પોસ્ટ્સનું અંગ્રેજીકરણ આ રહ્યું. ને હવે…

સર‘પંચ’

મહેનતનું મધ ખૂબ મીઠ્ઠુ તે આનું નામ….આફ્રિકાના જંગલમાં ૪૦ મીટર ઉંચા ‘ટેટે’ ઝાડ પરથી મધ પકડતો આદિવાસી. સાચે જ… ‘આમ’ માનવા જઈએ તો તેની મીઠાશ નો ‘કતરો’ પણ મળતો નથી. પણ ‘તેમ’ માણવા જઈએ તો ઉંચે ચઢ્યા પછીની મીઠાશનો ‘ઇસ્કોતરો’ મળી આવે છે. હવે કહો જોઈએ….લાઈફમાં બહુ ‘ટેટે’ કરવી સારી કે નહિ ?

મહેનત…મનોરથ…મધ…મદદ, મિઠાશની માહિતીઓ…આ મુર્તઝા પાસેથી…વખતો વખત મેળવવી હોય તો આજે જે આ બ્લોગ સબસ્ક્રાઈબ કરાવી લ્યો.

જુઓ ઈન્ટરનેટ કમાણી… જાણો ક્યાં ક્યાં છે સમાણી?

Earning_opportunities_on_the_Net

લોકો સૌ કેહ’ છેકે ઈન્ટરનેટ પર બહુ કમાણી,

જુઓ ઈન્ટરનેટ કમાણી, જાણો ક્યાં ક્યાં છે સમાણી?

જેમ અહીં ના સુકાય ડીજીટલ નેટ-દરિયાનું પાણી,
ત્યારે જોજો ના ગુમાય તકની વહેતી રે’તી લ્હાણી….

જુઓ ઈન્ટરનેટ કમાણી, જાણો ક્યાં ક્યાં છે સમાણી?

કન્ટેન્ટસની રમઝટ માટે હાજર છે ટ્વિટર-ઈ-મેઈલ,
પછી કોણ જોવા બેઠું છે તમને મેલ હોવ કે ફિમેઈલ,
ઇકડમ-તિકડમ ભાષામાં પણ ઠપકારો સંતવાણી…

જુઓ ઈન્ટરનેટ કમાણી, જાણો ક્યાં ક્યાં છે સમાણી?

પ્રોડક્ટ-સર્વિસને ફેલાવવા માટે છે ઉત્તમ બ્લોગ,
કેરિયરને પણ વિકસાવવા થઇ જાઓ એમાં લોગ,
વિચાર-વિઝનથી લોકો સાથે કરતા રહો ઉજાણી…

જુઓ ઈન્ટરનેટ કમાણી, જાણો ક્યાં ક્યાં છે સમાણી?

સમાઈ રહ્યું છે આખુ બ્રહ્માંડ સ્માર્ટ-ફોનની અંદર,
રચો તમારા બાહુથી એમાં ‘એપ્સ’બજારનું બંદર,
નેટગુરુ’ઓ કહી રહ્યાં છે આ એક વાત બહુ શાણી…

જુઓ ઈન્ટરનેટ કમાણી, જાણો ક્યાં ક્યાં છે સમાણી?

સર્ચ-એન્જિનનો સરતાજ એવો મહારાજ છે ગૂગલ,
ને સોશિયલ-મીડિયાની હુકૂમત કરે ફેસબુક મુઘલ,
સમજીને ઉપયોગ કરશું તો થતાં રહેશે ચા-પાણી…

જુઓ ઈન્ટરનેટ કમાણી, જાણો ક્યાં ક્યાં છે સમાણી?

જ્યાં માહિતીઓનો ધોધ વહે, ને આઈડિયા બને છે માતા,
જેમાં પેશન હોય તે પ્રાણ નીચોવે પિતા,બહેન કે ભ્રાતા,
જ્યાં ચોવીસો કલાક ફૂટતી રહેતી અખૂટ જ્ઞાન-સરવાણી….

જુઓ ઈન્ટરનેટ કમાણી, જાણો ક્યાં ક્યાં છે સમાણી?

વર્ચ્યુઅલ વર્લ્ડની સૌથી મોટી કોમ છે આ ‘ડોટ’કોમ,
ખુલ્લી આંખે ‘દોટ’ મુકજો ઓ’ ડીક, હેરી ને ટોમ,
સાંકળ-વિશ્વમાં પ્યાસાને પીવડાવજો પ્રેમનું પાણી…

જુઓ ઈન્ટરનેટ કમાણી, જાણો ક્યાં ક્યાં છે સમાણી?

|| મુર્તઝાચાર્ય ||

અંદરતો વર્ચ્યુંઅલી આ આચાર્ય હાજર હોવા છતાં કથાઓ મેં કરી નથી…ને કાયમી ધોરણે વિદ્યાર્થી બની રહેવું ગમતું હોવાથી બોરિંગ કાવ્યો રચ્યા નથી. પણ બ્લોગ દ્વારા વેપારની હાટડી જમાવવાના શોખમાં ને શોખમાં આજે ક્યાંથી અને કઈ રીતે આ કથા-કાવ્ય  કરવાની પ્રથા આજે આમ અચાનક બંધાઈ એનો મને ખુદને ખ્યાલ ન આવ્યો.

થયું એવું કે અત્યાર સુધી સાડા સાત વાર સાંભળી ચુકેલુ ‘સંતુ રંગીલી’નું મુંબઇ પરનું સુપ્રસિદ્ધ ગુજ્જુ ગીત “મુંબઈની કમાણી..મુંબઈમાં સમાણી” ને આજે બાકી રહેલા અડધા ગીતને આઠમી વાર પૂરું કરવા માટે સાંભળવા બેઠો. ને ત્યાં જ અચાનક એમાં આવતો ‘ધંધે’ શબ્દ કાને અથડાયો.

બસ વેપારની વાત ત્યાંથી જ શરુ થઇ ગઈ. ને મુંબઈના એ ગીતને ઈન્ટરનેટ પરના વેપારની ભાષામાં મરોડવા માટે મુકાઈ ગયો હાથ કી-બોર્ડ પર…એટલે આજે ‘આર્ટિકલ’ની આરતી ઉતારવાને બદલે વેપારીક ગીત-કથા થઇ ગઈ છે. હવે એમાં શબ્દોની બોર ખોદાઈ છે કે વાતાવરણ ‘ટદ્દન બોઓઓરર્રરીંગ’ થયું છે એ તો ખોદાયજી જાને….

પણ આજે ‘ઘન્નામાં થોરું’ કહેવા માટે આપ સૌનું શું કહેવું છે?

હવે દોસ્તો, અસલ ગીત પણ સાંભળી લેવું છે?..લ્યો ત્યારે આવી જાવ અહીં માવજીભાઈને ત્યાં..મુંબઈમાં…

સ્ટોપ-પ્રેસ || ફ્રેશ સમાચાર- ફેસબૂકના ચહેરા પર અચાનક ફરી વળેલો ફ્લશ એટલે ‘ગૂગલ પ્લસ’

Google_Plus

દોસ્તો! તમને સરપ્રાઈઝ લાગ્યું હશે. કેમકે આજે તો ગઈકાલના લખાયેલા પેલા તાજા વાંસની વાર્તાના બીજા ભાગનો વારો હતો ને વચ્ચે આમ અચાનક ફેસબૂક અને ગૂગલની વાત ક્યાંથી મંડાણી?!!?

પણ શું કરું? સમાચારની આ લહેર મસ્તીના મોજાંનું રૂપ ધારણ કરી ચૂક્યું છે. એટલે હઇશો…હઇશો કરી ચળને શાંત કરવી પણ જરૂરી બની છે. વાંસના બીજા ભાગ માટે બેફીકર બની જજો. વિચારબીજ તો વવાઈ ગયા છે. કાલે એમાં વધારે પાણી ને પછી કાપણી કરી લઇશું.

આજે તો આવી જઈએ આજના જોરદાર, મજેદાર અને મોજદાર સમાચારોમાં…  

દુનિયામાં વર્ચ્યુઅલી ત્રીજા નંબરનું રાષ્ટ્ર ગણાતા ફેસબૂક પર ગઈકાલે ગૂગલ મહારાજ દ્વારા ફ્લશ ફેરવવામાં આવ્યું. આમ જોવા જઈએ તો સમાચાર નાના છે. પણ એમાં રહેલી વાત બ્રહ્માંડી છે. પોતાની ‘ગૂગલ પ્લસ’ નામની એક નવીજ સોશિયલ મીડિયા સર્વિસને છડેચોક લઇ આવી તેણે ફેસબૂકના ગાલે સણસણતો તમાચો માર્યો છે. જેની ગૂંજ સેકંડ્સમાં સેંકડો, હજારો, લાખો લોકોને સંભળાવાઈ છે. સમજોને કે ગૂગલના મારા પેલા ફરફરતા આર્ટિકલમાં એક નવું સ્તોત્ર ઉમેરાયું છે.

સમગ્ર વિશ્વને તારું પોતાનું ગણી ગમે ત્યાં તારા ઢોર-ઢાંખરને લીલું ઘાસ ચરાવતા પહેલા સો વાર વિચાર કરજે કે આ નેટ-પ્રોપર્ટીનો માલિક કોણ છે? – ચારેકોર લીલુડી ધરતી કરીને પણ ધીમે ધીમે બધાં પાકને પોતાના કબજામાં કરતો રહેતો હું ભડવીર જમીનદાર છું. હે ભટકતા ભરવાડ! હું ગૂગલ છું.

હજુ થોડા દિવસો પહેલાં જ ફેસબૂકની ‘લાઈક’ બટનની સામે પોતાનો ‘+૧’ બટન દાખલ કરીને ગૂગલે સર્ચ-એન્જીન માટે નેટ-યુદ્ધનું રણશિંગુ તો ક્યારનુંયે ફૂંકી દીધું હતું. પણ એટલાથીયે ચેન ન પડતા હાથથી સીધા ફેસ ટુ ફેસ હૂમલો કરી ફેસબૂક સાથે રીતસરની ડીજીટલ દુશ્મનાવટ શરુ કરી દીધી છે.

  • ફેસબૂક કરતા વધારે સોશિયલ-ફ્રેન્ડલી, વધુ યુઝર-ફ્રેન્ડલી ગણતી આ ‘પ્લસ’ સેવામાં ઘણાં નવા ફેસ-ફિચર્સ અને બ્યુટી-પોઈન્ટસ મુકવામાં આવ્યા છે.
  • Circle, Hangout, Sparks, Huddle, Socialize જેવા મધમધતા શબ્દોનું અત્તર છાંટી પ્લસની આ દુનિયાને વધારે ખુશનૂમા બનાવવામાં આવી છે. એટલે તેમાં જે કાંઈ પણ છાનું છપનું કરવું હોય તે માટે વિશેષ સગવડો આપવામાં આવી છે.
  • જે ફેસબુકમાં સગવડો છે તે તો બધી ખરી પણ જે નથી તેવી સગવડો જેવી કે…રીયલ ટાઈમ વિડીયો ચેટિંગ, મીટીંગ-પોઈન્ટસ, ઇન્સ્ટન્ટ ફોટો અપલોડ વગેરે પર પણ સારો એવો હાથ અજમાવવામાં આવ્યો છે.
  • હરતા-ફરતા (મોબાઈલ પરથી) પણ આંગળીને ટેરવે આખું નેટવર્ક ચલાવી શકો એવી રચના કરવામાં આવી છે.

ટૂંકમાં, સામાજિક ઓટલા પર ગરમાગરમ રોટલાં સાથે રસદાર ગોટલાની મિજબાની કરાવવામાં આવશે.

ગૂગલને પાછલે દરવાજે સવાલ પૂછવામાં આવે છે કે “ફેસબૂકની સામે આવું ઉભુ આડવેર શા માટે?”

ગૂગલી જવાબ: “કોઈ પણ કંપનીને રાષ્ટ્રનું બિરુદ આપવામાં આવેજ કેમ? એ પણ અમને પૂછ્યા વગર?….બહુત નાઇન્સાફી હૈ બચ્ચોં!”

પણ પ્રબુદ્ધજનો! હવે તમને ફેસબૂકથી ટ્રાન્સફર થઇ ‘ગૂગલ પ્લસ’ પર દોસ્તી કરવા માટે કે વેપાર કરવા માટે આવવું હોય તો થોડી રાહ જોવી પડશે કેમ કે આજે તો માત્ર આ માયામહેલની જાહેરાત જ કરવામાં આવી છે. તેના દરવાજા ખુલતા થોડો વખત લાગશે.

ત્યાં સુધી તેની માયાજાળ જોઈ લેશો તો પણ લેખે લાગશે. જવું ન જવું તમારા ‘ફેસ’ પર (આઈમીન પ્લસ) પર છે.

 હવે તાજા વાંસની વાર્તાનો બીજો મજ્જેનો એપિસોડ…આવતી કાલે ચોક્કસ બસ….