મફત રમત રમાડે…મોબાઈલ !

(તો ચાલો લગાવીએ….ગઈકાલે મુકેલા ‘એપ’ની પોસ્ટનો મોતીડો કૂદકો…)

જસ્ટ ઈમેજીન! તમને મહેલ જેવી બિલ્ડીંગના એક મસ્ત મજાના રૂમમાં લઇ જવામાં આવે છે. જ્યાં…

• વાંચવા માટેના ટેબલ-ખુરશી છે..

• જેના પર લેમ્પ મુકેલો છે…

• દિવાલ પર પિક્ચર ફ્રેમ ભરાવેલી છે…

• તેની પાસે પુસ્તકોની એક છાજલી છે..

• છત પર ઝુમ્મર છે..

• રૂમની વચમાં સોફો છે અને તેની પાસે આર્મ-ચેર છે…વગેરે…વગેરે..

હવે સમજો કે તમને રૂમમાં પૂરી દેવાયા છે. પણ તેમાંથી નીકળવા માટે અલગ-અલગ જગ્યાએ ક્લુઝ (સગડ) મુક્યા છે. જે હિન્ટ દ્વારા શોધી અંતે તેની ચાવી મેળવી ‘બારે’ નીકળવાનું છે.

….તો આ છે આઈફોન-આઈપેડની એ ગેમ જે (ઓફકોર્સ) અમારા દિમાગના દહીં દ્વારા તૈયાર થઇ છે. નામ છે: ગ્રાન્ડ મેન્શન એસ્કેપ! (Grand Mansion Escape)

જેમાં આવા બીજાં અભિન્ન આંઠ રૂમ્સ છે….જેને અર્જુનના કોઠાની જેમ પસાર કરી મહેલની બહાર આવવાનું છે.

સર્ચ, સિક્રેટ, એન્ટરટેઇન્મેન્ટ, ઇન્વોલ્વમેન્ટ, એન્ગેજમેન્ટ જેવાં પહેલુઓ દ્વારા આપણા દિમાગને વલોવવાની પ્રક્રિયાને આવી ગેમ દ્વારા માર્કેટમાં મુકવાનો અમારો મુખ્ય હેતુ હાલ પુરતો કહું તો: “તકને ઝડપી ટેકનોલોજી સાથે હાથ મિલાવવાની છે.”

પણ આ બધું શક્ય બનતું જશે એક અને માત્ર એક કારણે: યુઝર્સ…કે પ્લેયર્સ. યેસ! જેટલાં વધું લોકો તેને વાપરતા-રમતા જશે એટલી તે વધારે જાનદાર બનતી જશે. અને એ જ કારણે જ..ઇસલિયે હી તો….આ ગેમ સાવ મફતમાં આપી દેવાઈ છે. જાવ ખેલો મુફ્તમેં !

સમયાંતરે એમાં નવી થિમ્સ, નવી ચેલેન્જીઝ અને નવા વિષયો ઉમેરવામાં આવશે. જો કે તેમાં વધું શું અને કેવું કેવું અંદર આવતું જશે???!?!? તે બાબતને પણ હાલ પુરતી (ગેમના બેઝની જેમ સ્તો) સંતાવી રાખવામાં આવી છે.

પણ આ ગેમ-એપને અમોએ એક ખુબ અકસીર એવી ઓનલાઈન માર્કેટિંગની હોટ સિસ્ટમ પર લોન્ચ કરી છે. નામ છે, ‘ક્રાઉડ-ફંડિંગ’ (જે વિશે થોડાં વખતમાં આપ સૌને વધુ જાણકારી મળશે. પણ અત્યારે કહું તો…

|| “જેઓને માર્કેટમાં રહેલી કોઇપણ ગમતી પ્રોડક્ટ કે સર્વિસને વધારે વિકસાવવામાં રસ હોય તે વ્યક્તિ કે સંસ્થા તેના મૂળ માલિકને યથાયોગ્ય ફાઈનાન્સિયલ ફાળો (કન્ટ્રીબ્યુશન) આપે છે. જેની સામે મૂળ માલિક તે કન્ટ્રીબ્યુટરને આવનાર પ્રોડકટ અથવા તેની સાથે સંકળાયેલ બાબતનું ઇનામ આપે છે.” ||

દોસ્તો, વધારે સમજવું છે? – તો એક કામ કરો. આ લિંક http://igg.me/at/grandmansion પર આવી જ જાઓ.

જેમાં ગેમની ડાઉનલોડ કરવાની લિંક સાથે આ તેને વિકસાવવાની તક-લિંક પણ મુકવામાં આવી છે. તમને લાગે કે ગ્રાન્ડ-મેન્શનને ગ્રાન્ડ સક્સેસ આપવી છે, તો તેમાં માઈક્રો-ઇન્વેસ્ટમેન્ટ કરી અમને સાથ આપી શકો છો. (જો કે તેના ઇનામો પણ ભારે છે હોં!)

તો હવે તમને એક ‘એપી’ક સવાલ થાય: “માર્કેટિંગના માણસ થઇ…મુર્તઝાભાઈ, તમે મોબાઈલની આવી માથાકૂટમાં કઈ રીતે આવ્યા?

જવાબ: “દોસ્તો, લર્નિંગ એન્ડ અર્નિંગ બંને એકસાથ જે કરે તે માહિતીના મહાસાગરે મોતીડાં મેળવે. ટૂંકમાં.. ઝમાને કે સાથ ચલના ભી તો માર્કેટિંગકા હી કામ હૈ ના?!?”

વેપાર વિકાસ- તેમાં ડૂબકીઓ મારો તો મોતીડાં પણ મળે !

પહેલા…બનેલી એક એક્ચ્યુઅલ ઘટના:

“ ભાઈ, ઈમ્પોર્ટ-એક્સપોર્ટનો બિઝનેસ હવે મારા માટે ખરેખર મોનોટોનસ બની ગયો છે. કોઈક નોખા અને નવા કેવા પ્રોજેક્ટસ થઇ શકે તેની ચર્ચા તમારી સાથે કરવી છે. જો એટ-લિસ્ટ ૧ કલાકનો ટાઈમ મળે તો જણાવશો.”

– સન ૨૦૧૧ના વચમાં મારા સાચા શુભેચ્છક એવા ક્લાયન્ટ-દોસ્તનો ફોન આવ્યો. અવારનવાર તેમના બિઝનેસમાં મદદરૂપ થયેલો એટલે વિશ્વાસનું વ્હાણ વિના તકલીફે ચાલતું રહેલું. પણ આ વખતે આવેલા ફોનમાં અલગ હોશ દેખાયો. એટલે તેને જોશ આપવા તે જ દિવસે સાંજે મિટિંગ પણ ગોઠવાઈ ગઈ.

જેને સિરિયસ બ્રેઈન-સ્ટોર્મિંગ કહી શકાય એવી એ મિટિંગમાં ગરમ કૉફી સાથે તેમનામાં સૂતેલાં ઠંડા આઈડિયાઝની ઘણી ચર્ચાઓ થઇ. ત્યારે ઉભા થતી વખતે એક ને બદલે અઢી કલાક પસાર થયેલો હતો.

પણ તે બાદ ૨-૩ દિવસ સુધી ફિડબેક માટે ન તો એમનો કોઈ ફોન આવ્યો કે મેઈલ. મને થયું કે તેમના માટે બ્રેઈન-બાજી બોરિંગ થઇ હશે. પણ ચોથા જ દિવસે સવારે અચાનક… “મુર્તઝાભાઈ, આપણી જે લાસ્ટ મિટિંગ થઇ એમાં તમારા એક પોઇન્ટે મને પાછલાં ૩ દિવસથી સુવા દીધો નથી. છતાં મને લાગે છે કે હવે હું ખરેખર જાગ્યો છું. લેટ્સ સેલિબ્રેટ! આજે લંચ સાથે કરવાનું છે. ચાલો રેડી રેજો.”

તો આવી રહ્યો છે એ અસલ બિગબોસ !

આપણા મૂળભૂત હક્કોમાં નો એક… ‘બોલવાની સ્વતંત્રતા’નો ઈંટરનેટના આગમન પછી તુમ, મૈ, આપ, વોહ…સૌ ખુલ્લેઆમ ગાળોથી માંડી, (વિ)ભદ્ર કાર્ટુન્સ, બિન-આકાશવાણી પ્રવચન કે વિડીયોઝ દ્વારા ભરપૂર લાભ ઉઠાવી રહ્યાં છીએ, બરોબર?

પણ સાવધાન! ભારતીય ગૃહ મંત્રાલય નામના બીગ બોસે ‘નેત્ર’ નામની સર્વેલિયન (ચાંપતી નજર) ઓનલાઈન સિસ્ટમ તૈયાર કરી દીધી છે. અને ટૂંક સમયમાં જ લગભગ બધી જ પ્રાઇવેટ અને (પબ્લિક) જાસૂસી સંસ્થાઓ દ્વારા ઇન્સ્ટોલ કરવામાં આવી રહી છે.

જેમનું મુખ્ય કામ વિવિધ મલ્ટીમીડિયામાં થતી (સાયબર બુલિંગ) એક્ટીવીટીઝ પર સતત નજર રાખવાનું છે. જેઓ ‘અટેક!’, ‘બોમ્બ’ ‘કાપો- મારો’ ‘બરબાદ કરી નાખો સાલાઓને !’ જેવા (વ્યવહારુ) શબ્દોના મૂળને પકડી તેમની પર કાર્યવાહી કરશે.
(આમાં ‘તોડી નાખો તબલાં ને ફોડી નાખો પેટી’ નો સમાવેશ થયો છે કે નહિ એની જાણકારી નથી.)

એટલે હવે….લેન્ડ-ટેલીફોનીંગ, સેલ-ફોન, વોઈપ સાથે ઈ-મેઈલીંગ, વોટ્સએપ-સ્કાય્પ-ગૂગલ ચેટિંગ, સોશિયલ-મીડિયા અપડેટ્સ, ટ્વિટર-મેસેજ, બ્લોગ્સ પોસ્ટ્સ જેવાં દરેક પ્લેટફોર્મ્સ જ્યાં ડેટાનો પ્રવાહ સતત ઠલવાય છે તેની પર નજર રાખવામાં આવશે.

એક તરફ અમેરિકાની આવી જ એક સંસ્થા (એન.એસ.એ.) ને ત્યાંની ફેડરલ કોર્ટ તરફથી નાગરિકોની પ્રાઇવેટ ઝિંદગીમાં સતત ડોકિયું રાખવાની (ઓફિસિયલ?!?!) પરવાનગી મળ્યા પછી તેની અસર હેઠળ બીજાં કેટલાંક દેશોની સરકારો તેમના કેમેરાની જેમ ‘ઝૂમ’વા લાગી રહી છે.

પણ બીજી તરફ તેની સામે વિશ્વની મોટી મોટી કંપનીઓ વિરોધ કરી રહ્યાં છે. એટલા માટે કે…તેના દ્વારા તેમની મૂત્ર-વિસર્જનથી લઇ વિચાર-વિસર્જનની દરેકેદરેક હિલચાલ ખુલ્લી પડી શકે છે. સબકુછ દિખતા હૈ!

(હવે રહસ્ય સમજાય છે ને કે આપણા બોલચાલની સામે જડ-મૂળ ‘મૌન’ કેમ છે?)

“ભૂલેસે મોહબ્બત કર બેઠા, નાદાં થા બેચારા ‘દિલ’હી તો હૈ,
હર દિલસે ખતા હો જાતી હૈ, બિગડો ના ખુદારા ‘દિલ્હી’ તો હૈ!”

તો કદાચ તમને આ આર્ટિકલ પણ વાંચવો ગમશે…

વ્યાપાર વનિતા: તમને આ રીતે ‘ગળે પડવું’ ગમશે?

પટેલની જીભ એટલે ‘શાર્પ તલવાર’. એક વાર વાગે એટલે કેટલા કટકા થાય એ વિશે કહી ન શકાય, પણ થાય એની ગેરેંટી.

પણ જો પટેલની બ્યુટી, બ્રેઈન અને બોલ (રમવાનો નહિ પણ શબ્દોનો હોં !) ત્રણે અમેરિકાના ‘બોસ્ટનમાં’ એકસાથે ભેગાં થાય ત્યારે ત્યાં રેવોલ્યુશન થાય જ એમાં કોઈ શક ખરો?- જરાયે નહિ લ્યા!

અને એમાંથીયે એક પટલાણી બહાર આઈ જાય તોહઓઓઓઓઓઓઓ…?!?!? તો એનું નામ જલ્દી જલ્દી બોલાઈ જ જાય…

રૂપલ પટેલ.

(Communication Analysis and Design Laboratory)ના ડાયરેક્ટર તરીકે આ દેશી-રૂપાળી રૂપલબૂને ‘બોલવા’ની બાબતમાં સાયન્ટિફિક સોલ્યુશન આપી વિદેશી મીડિયામાં ‘કોમ્યુનિકેશન’ના એક ‘પ્રોબ્લેમની બોલતી બંધ’ કરી છે. હો વે..આપડેહ શીધી ભાસામોં કહીયે તોહ..

‘જે લોકો બોલી શકતા નથી, તેમના માટે તેણે ‘વોકલ આઈ.ડી.’ (VocalID) નામની ટેકનોલોજી વિકસાવી છે. જે ન બોલી શકનાર વ્યક્તિના ગળામાંથી નીકળતા એક્ચ્યુઅલ વેવ્સને પકડી વર્ચ્યુઅલ વોઇસમાં રૂપાંતર કરે છે. આ વોઇસ સિન્થેટીક વોઇસ પણ હોઈ શકે. એટલે કે….બોલી શકનાર એવી વ્યક્તિના અવાજને, ન બોલી શકનાર માટે ઉપયોગમાં લેવાય છે.

બહુ ગળે અટકી જાય એવી વાત લાગે છે ને?- તો એક કામ કરો. http://vocalid.org/ પર જઈ વધારે એ ટેકનોલોજી વિશે (અને થોડું-ઘણું રૂપલબૂન વિશે) પણ જાણી આવો. શક્ય છે આપણામાંથી કોઈનો પટેલી અવાજ અન્યને બોલવામાં મદદ કરી શકે…

બોલો હવે….આવી બાબતમાં કોઈકના માટે ‘ગળે પડી’ને પણ સદ્કાર્ય થઇ શકે છે. કેટલીક બાબતો ‘ભોડામોં મેહલવાની નઈ પણ મોઢામોં (ફિ)મેહલવાનીય હોય, હું ચ્યોં સ, ખરું ન?

જે હોય તે…મેં તો આ ટેકનોલોજીને ‘પટેલીકોમ્યુનિકેશન’ નામ આલી દીધું છે ભ’ઈ !

|| જો એ ‘હોટ’ થયા પછી ‘શોટ’ થયું હોત તો ???………||

ઈ.સ. ૧૯૭૧ની શરૂઆતનો સમય. સ્ટિવ જોબ્સ અને તેનો સાથી સ્ટિવ વોઝનિયાક કોલેજના પગથીયાં ચડવાની શરૂઆત કરી રહ્યા હતા. એકનું મગજ માર્કેટિંગના મકાન તરફ દોડતું ને બીજાનું કોઈક ટેકનિકલ ટાવર’ તરફ.

કેમકે પાછલા બારણે ઓફીશીયલી તો નહિ પણ બ્રાન્ડ વિનાના ‘એપલ ૧’ નામના એક તોસ્તિક કોમ્પ્યુટર બનાવવાની શરૂઆત તો થઇ ચુકી હતી. છતાંય બંનેના નસખેંચું મગજો સતત ક્યાંક ચકરાવો લીધાં કરતા હતા.

ત્યારે એક દિવસે વોઝનિયાકે જોબ્સને ‘એસ્ક્વાયર મેગેઝિન’નો લેટેસ્ટ અંક બતાવ્યો. જેમાં કોઈક ‘બ્લ્યુ-બોક્સ’ વિશે માહિતી મુકવામાં આવી હતી. ( દેશી ભાષામાં કહીએ તો આ બ્લ્યુ-બોક્સ એટલે તે સમયના લેન્ડલાઇન ટેલિફોનની (બાય ડીફોલ્ટ) ટોનને બદલી ‘પાછલે-બારણેથી મફતમાં થઇ શકતા ઇન્ટરનેશનલ ફોન કોલ્સનો ડબ્બો.)

જોયા પછી જોબ્સે કહ્યું: “વોઝ, તું ભાવ કાઢ. બનાવીએ તો કેટલાંમાં પડશે? પછી વેચવાનું કામ મારું.”

“જોબ્સ, મેં માત્ર પાર્ટસ સાથે અડસટ્ટે ભાવ લગભગ કાઢ્યો છે, લગભગ ૪૦ ડોલર્સ. મહેનત-મજૂરીના અલગ ગણવા પડે. હવે કેટલામાં વેચી શકીએ એ તું બોલ.”

“હું માનું છું કે આપડી કૉલેજના એવા છોકરાંવથી જ શરૂઆત કરીએ જેઓને તેમના દેશમાં ફોન કરવા પડતા હોય તો ૧૫૦ ડોલર્સમાં તો આરામથી વેચાઈ શકે.”

પછી તો વોઝ પિંક મૂડમાં આવી મંડી પડ્યો બ્લ્યુ-બોક્સ બનાવવાના ધંધે. શ્રી ગણેશ તો થયા પણ હજુ વેચાણની શરૂઆતમાં જ એક જગ્યાએ અચાનક આ બંને સ્ટિવડાઓને પોઈન્ટ-બ્લેન્ક લેવલે ગન મૂકી લૂંટવામાં આવ્યા.

બેઉ જણા સમજ્યા કે ‘પાર્ટી’ને બ્લ્યુ-બોક્સનો દલ્લો જોઈએ છે. પણ પેલા બંદૂકધારીએ માત્ર એટલી બુલેટ-પોઈન્ટ વાત આપી છોડી દીધા કે… “બચ્ચું! ખબરદાર આ ધંધામાં કાંઈ પણ કર્યું છે તો…ચુપચાપ તમારો ઇલેક્ટ્રોનિક બિસ્તરો ઉપાડો અને ખોવાઈ જાવ ક્યાંક બીજી જગ્યાએ…”

ને બસ…બ્લ્યુ-બોક્સ બન્યું બ્લેક-બોક્સ. અને તેમની પાછળ (ધૂળમાં) પડેલા ‘એપલ -૧’ની સુવાવડ કરાવવાની તૈયારી શરુ થઇ. પણ આ બનાવમાંથી બંનેને એક ‘ગ્રીન લેશન’ મળ્યું: ‘અબ કુછ ભી હો જાયે પ્યારે, યેહ દોસ્તી હમ નહિ તોડેંગે… તોડેંગે દમ મગર તેરા સાથ ન છોડેંગે.”

“અલ્યા એય સ્ટિવડા, સાંભલે ચ કે તું? જો એ બ્લ્યુબોક્સ ‘હોટ’ થયા પછી ‘શોટ’ ન થયું હોત તો………તારા એપલની શરૂઆત થઇ શકી હોત!?!?? – શું કેછ પોરિયા તુ?

મૈત્રી મોરલો: “સાચો દોસ્ત ક્યારેય પણ દૂર નથી હોતો.”

IPhone 5C: colorful Or cheap ? યા કુછભી નયા નહિ મિલા રે….?!?!

શહેરના કોઈ સોફિસ્ટિકેટેડ જુવાનને ગામડાનો ભાતીગળ પોશાક પહેરાવી (સમજો કે તરણેતર)ના મેળામાં છુટ્ટો મુકવામાં આવે તો કેવો લાગે?- એવો જ ગઈકાલે લોન્ચ થયેલો એપલનો નવો ફોન iPhone 5C બન્યો છે.

“મારા ગ્રાહકોને શું જોઈએ છે, હું તેની પરવા કરતો નથી. પણ એમને કેવી બેસ્ટ અને યાદગાર પ્રોડકટ/સર્વિસ આપી શકું એ બાબત મારા માટે વધારે અગત્યનું છે.”

એવું કહેનાર અને માનનાર સ્ટિવ જોબ્સે વર્ષો સુધી ખુદના આઈડિયા પરથી સુપર સક્સેસીવ માર્કેટ ચલાવ્યું. પણ હવે તેના ગયા પછી ઘેંટાના ટોળાની જેમ ડિમાંડ પૂરી કરતુ એપલે ‘ઇનોવેશન’ના જીનને સ્ટિવની કબરમાં પુરી દીધું હોય એવું લાગી રહ્યું છે. જે થઇ રહ્યું છે તે માત્ર ઇમ્પ્રુવમેન્ટ. નો ઇનોવેશન!- વાત પૂરી.

મોબાઈલ-ટેકનોક્રેટ્સ અને તેના સર્વે હરીફોએ ગઈકાલના લોન્ચ બાદ “કુછભી નયા નહિ મિલા રે….” કહી ખંધુ હસીને પાર્ટી મનાવી છે. તેની સામે એન્ડ્રોઇડ અને સેમસંગને કેટલાંક બોનસ પોઈન્ટ પણ મળ્યા છે.

ખૈર, -.-.-.-.-.-.-.- ધારો કે એ જ સ્ટિવ ફરીથી ક્યાંકથી પેદા થઇને પાછો આવી જાય તો સૌથી પહેલું કામ થોડી વાર માટે જ રડવાનું તો કરશે. પણ સાથે સાથે ‘માતૃ-ભગિની’યુક્ત વિદેશી શબ્દ-પ્રયોગો કરશે.

પછી તેના હાલના CEO ટિમ કૂકને ક્યાંક મોકલી દેશે. પછી તડીપાર કરાયેલા તેના એન્જિનિયર સ્કોટ ફ્રોસ્ટેલને પાછો લઇ આવશે અને સોફ્ટવેરની અનોખી નવી સિસ્ટમ લઇ આવશે.

પછી તેના જીનિયસ ડિઝાઈનર જોનાથન ઇવ પાસે કોઈક મરી પરવારેલા હાર્ડવેરમાં નવો જાન ફૂંકી હાર્ડવેર માર્કેટમાં રેવોલ્યુશન લાવશે. અને આ જોઈ મારા જેવાં વર્લ્ડ-વાઈડ ચાહકો ૭૨૦ અંશના ખૂણે નાચવા લાગશે.

આ હું યકીન સાથે એટલા માટે કહી શકું કે પાછલાં દસકાથી એ સ્ટિવડાના દિમાગી દીવડાને સળગતો જોયો છે. મેં તેને સમયાંતરે ‘અશક્ય’ નામના શબ્દ માંથી ‘અ’ કાઢતા જોયો છે. – (પૂછના હૈ તો મેરે દિલસે પૂછો કે મૈ હોર્લિક્સ ક્યોં પીતા હૂ?).

પણ હાય રેએએએએ! વોહ દિન કહાં સે લાયેએએએએ?

બટ ફિકર નોટ! અત્યારે સ્ટિવ જેવો જ એક ડાયનામિક અને મસ્ત માણસ માર્કેટમાં આવી ગયો છે.: ટેસ્લા કંપનીનો માલિક મી. એલન મસ્ક. એની પર નજર રાખવા જેવી છે. લીખ લો ઠાકુર કુછ નયા આ રહા હૈ!

વેપાર વાવડ: બ્રાન્ડિંગનું ‘રોવ્લિંગ’ આ રીતે પણ કરી શકાય…

લંડનમાં આવેલો ગોલ્ડઝબોરો બૂકસ્ટોર નવી આવતી (અને બેસ્ટ-સેલર્સ બની શકે તેવી) બૂક્સની વેલ્યુ વધારવા તેના લેખકની સિગ્નેચર સાથે વેચવામાં મશહૂર છે.

થોડાં અરસા અગાઉ તેના માલિકે એક નવા જ ઉદ્ભવેલા લેખક રોબર્ટ ગોલબ્રેઈથના લોંચ થયેલા પુસ્તક ‘ધ કૂકૂઝ કોલિંગ’નું પણ માર્કેટિંગ કરવા ટ્રાયલ-ઓર્ડરરૂપે સાઈન કરેલી ૨૫૦ કૉપીઝનું ખરીદ કર્યું. વેચાણ ભાવ રાખ્યો: ૧૭ બ્રિટીશ પાઉન્ડ.

ગોલ્ડઝબોરો બૂકસ્ટોરના માલિકને અનુભવ પરથી ખબર તો પડી કે લેખકનું અસલ નામ બીજું જ કાંઈ છે. પણ તેને તો નામ કરતા દામમાં વધારે રસ હતો એટલે વાતને પણ ત્યાં જ પડતી મૂકી.

હવે આપણામાંથી કેટલાંક વાંચક દોસ્તો જાણતા જ હશે કે આ રોબર્ટ ગોલબ્રેઈથના પેન-નામ હેઠળ હેરી પોર્ટરની મશહૂર લેખિકા જે.કે.રોવ્લિંગનું નામ કોઈક રીતે બહાર ટપકી આવ્યું. જાહેરમાં થોડી ખફા થઇને તેણે આ વાતનો સ્વિકાર પણ કર્યો.

જ્યારે આ બાજુ સ્ટોરના માલિકને તો નાનકડી લોટરી લાગી ગઈ. સાઈન કરેલા ૧૭ પાઉન્ડના પુસ્તકનો ભાવ તેણે રાતોરાત ૧૦૦૦ પાઉન્ડ કરી નાખ્યો અને તેના નસીબે બધી નકલો ચપોચપ વેચાઈ પણ ગઈ…બોલો !

જો કે…ગોલ્ડઝબોરોનો આ માલિક હજુયે પસ્તાય છે. એટલાં માટે કે…તેણે માત્ર ૨૫૦ કૉપીઝ કેમ ખરીદી?!?! જો અંદરખાનેથી (પેઈજમાંથી) ખબર પડી ગઈ હોત તો કદાચ જે.કેના નામ પર હજુ વધારે જેકપોટ કમાણી કરી હોત!

ખૈર, બ્રાન્ડિંગ દ્વારા કમાણીનું ‘રોવ્લિંગ’ કેમ કરવું તે આ બ્રિટીશર્સ પાસેથી શીખવા જેવું તો ખરું.

| માર્કેટ મોરલો |

=>• જૂનો (ખોટો પડેલો) ક્વોટ: “નામમાં શું છે?- ગુલાબને કોઈ પણ નામે બોલાવો તેની સુગંધમાં કોઈ ફરક પડતો નથી.”- શેક્સપિયર

=>• નવો (સાચો પડેલો) ક્વોટ: “નામમાં ઘણું બધું છે. બસ તેનું ‘સુગંધીદાર’ બ્રાન્ડિંગ જરૂરી છે.” – મુર્તઝાચાર્ય.
>

જેમને પુસ્તક ‪The Cuckoos Calling ખરીદવું જ હોય તેમના માટે આ લિંક..કોલિંગ:

http://bit.ly/13vO6Af  

http://amzn.to/135yZKx

વિકાસ વાવડ: નેટ જંગલના મંગલકારી સમાચારો…

ગૂગલના ‘ફેર’ ગૂગલી સમાચાર…

પાછલા બ્લોગ પોસ્ટમાં પેલી ગૂગલના સાયંસ ફેરમાં જીતીને આવેલી ભારતીય કૂડ્ડીઓની વાત થઇ હતી. તો દોસ્તો, એ જ ગૂગલનો સાયંસ-ફેર ફરી પાછો પોતાનો દરવાજો ખોલી રહ્યો છે. કેરિયરને સાયકલ કે બાઈક પર ગોઠવવા કરતા લાઈફ-બોટમાં સમાવવામાં શાણપણ છે.  હવે તમને, અથવા તમારા ભાઈ-બહેન કે બાળકમાં કોઈક હટકેપણું લાગતું હોય તો આજે જ આ ફેરની સાઈટ પર જરા હવા-ફેર કરી આવવા જેવું છે.

http://www.google.com/events/sciencefair/

ક્યાંક એવું પણ થઇ શકે ને કે આ વર્ષે તમારામાંથી ક્યાંક કોઈકનો નંબર….ગૂગલી મારી શકે!

——————————————————————————————

જંગલીના મંગલી સમાચાર…

દુનિયાની સૌથી મોટ્ટામાં મોટ્ટી, હજારો પ્રકારની પ્રોડક્સમાં અપરંપાર, કસ્ટમર સર્વિસમાં અગ્રેસર એવી એમેઝોન.કોમ ઇન્ડિયામાં લોન્ચ થઇ ચુકી છે. વાત કરવી છે. ‘જંગલી.કોમ’ની.

નામ ભલેને વાઈલ્ડ હોય પણ તેની ડણાક ઇન્ડિયાના ઈ-કોમર્સ માર્કેટમાં ગુંજી ચુકી છે. દોસ્તો, ખિસ્સામાં દામ ભલે ના હોય પણ હૈયામાં હામ હોય તો પેસિફિક સમુદ્રમાંથી હિન્દ મહાસાગરમાં આવી ગયેલા તકોના મોજાંઓને પકડી લેવા જેવા છે. તમારી પાસે નેટવર્ક-પ્રોગ્રામિંગની સ્કિલ્સ હોય કે સોફ્ટવેર ડેવેલોપમેંટની…યા પછી લોહીમાં ખરા ઉતરે એવા ઇન્ટેન્સિવ માર્કેટિંગનું જ્ઞાન કે કસ્ટમરને દોસ્તમાં ફેરવવાની સ્કિલ્સ….સાવ અલગ અને સાચે જ ‘હટકે’ વર્તન કરવાની ત્રેવડ હોય તો જંગલી.કોમ પર એપ્લાય કરવા જેવું છે.

ઈન્ટરનેટ પર એમેઝોન.કોમની છત્રી હેઠળ ઘણાં ભારતીયોએ અમેરિકામાં નામ અને દામ કમાઈ રહ્યા છે. શું વેચવું અને કઈ રીતે વેચવું એની સોફીસ્તીકેટેડ ટ્રેઇનિંગ એમ.બી.એ.ની ડિગ્રી પણ આપી શકતી નથી. એ માટે તો સરિતામાંથી મહાસાગર બનેલી એમેઝોન.કોમના જંગલમાં ઘૂસ મારવી પડે.

http://www.junglee.com/f/1000604193/ref=footer_hiring

બોલો કોણ છે જે મને સૌથી પહેલા ખબર આપી શકે છે કે “મુર્તઝાભાઈ, જંગલી.કોમના જંગલમાં મને તક મળી છે- આભાર.”

સવાલ: વેપારની વાતો કરતા આ બ્લોગ પર આમ ‘જોબ’ ઓફરની વાત શા માટે?-

જવાબ: સિમ્પલી!….કુનેહ શીખવા માટે.

આજે ઘણાં કેરિયર-ઓરિએન્ટેડ દોસ્તો સર્વિસની સીડી ચઢીને બિઝનેસના બંગલા સુધી પહોંચતા થયા છે.  ‘જોબ’ માર્કેટમાં જેટલો અસરકારક અનુભવ એટલી ધંધામાં સફળતા વધુ અકસીર. અને એ માટેની તૈયારી કરવા માટે તમારામાંથી ઘણા ને હવે ખબર તો હશે જ કે…આ પ્રકારના પુસ્તકો વાંચવા જ રહ્યા.

“માત્ર ચમકતા ચાઈલ્ડ બની રહેવા કરતા વિફરતા વાઈલ્ડની વેલ્યુ વધારે છે.”–  મુર્તઝાચાર્ય.

ખૈર, તમને એવું કોણ યાદ આવી ગયું જેમને આ લેખ પસંદ આવી શકે?- તો હમણાં જ લખી નાખો એમનું નામ અને ઈ-મેઈલ. પછી મોકલવાની જવાબદારી મારી…

એમનું નામ શું?(જરૂરી)

એમનો ઈ-મેઈલ?(જરૂરી)

જમા કરવું

Δ

સર-ચોરસ ‘પંચ’:

ચોરસ કાણું કરી (અક્કલને ‘હોલ’) કરતુ ડ્રિલ-મશીન: એ તો જગ જાહેર છે કે અવનવી કરામતો, શોધખોળો કરવામાં જાપાનીઓ લાજવાબ છે જ….હવે આ ગોળ કાણાને બદલે ચોરસ કાણું કરી આપતા ડ્રિલ મશીનને જ જોઈ લ્યોને…જોયા પછી એમ જરૂર લાગશે કે અક્કલમાંય થોડું થયું ખરું!

 

વેપાર વાવડ: ‘આઈઝ’ સાથે હવે મોં પણ ખોલતો એપલનો અવ(નવો) આઈ-ફોન 4S

Image(c) Apple.com

આખરે આઈફોન- 4S ભારતમાં પણ લોન્ચ ગઈકાલે જ થઇ ગયો…

નાનકડાં પણ ખુબ અકસીર સુધારા-વધારા કરાવી આ આઈફોને ગૂગલના એન્ડ્રોઇડ ફોનના માર્કેટ પર ફરીથી હુમલો કર્યો છે. તોયે…સ્ટિવભાઈના ગયા પછી પણ એપલનું પ્રોડક્ટ ‘લસ્ટ’ અને ‘કલ્ટ’ કલ્ચર પર તેની કોઈ અસર થઇ નથી.

મોબાઈલ ફોન ફક્ત ‘ટેએલી-ફૂન’, ‘એસેમેશ’, ‘મિશ્ કોલ’, ‘ઈ-મેહિલ ચેક’ કર નાખવા જેવા કામોથી હવે ધીમે ધીમે સ્માર્ટ બની રહ્યો છે. તેનો વખત હવે સુપર ફાસ્ટ બદલાઈ રહ્યો છે. અવનવી કરામતો દ્વારા ટેકનોલોજીસ્ટ તેને માત્ર કોમ્યુનિકેશનના સાધન તરીકે ન રાખતા આવા સ્માર્ટફોનને એક નાનકડો રોબોટ બનાવવા મથી રહ્યું છે.

આઈફોનની આંતરિક-યાંત્રિક વ્યવસ્થાને ડિટેઈલમાં જાણવી હોય તો એપલની સાઈટ પર માહિતીઓનો ખઝાનો ભરેલો પડ્યો જ છે. પણ મને (અને દુનિયા બીજા મેક-મેનીયાકોને પણ) ગમી ગયેલી કેટલીક બાબતો વિષે નાનકડો પ્રકાશ પાડવો છે. એટલા માટે કે…કાલે સવારે તેમાં રહેલાં ‘કમાન્ડઝ’ જ આપણા આખા ઘરનું અને લાઈફનું કમાન્ડિંગ કરવા આવી રહ્યાં છે….ન છુટકે..લીખ લો!

• ૮ મેગા પિકસલ વાળો સુપિરીયર કેમેરા…એવી શાર્પ ઈમેજ વાળો ફોટો જેને તમે ડાઉનલોડ કર્યા વગર અંદરથી જ ‘મોડિફાય’ કરી શકો ને પછી ક્રિસ્પી પ્રિન્ટઆઉટ લઇ શકો.

• કપાળેથી ભ્રમરોમાં અટકી પડેલો પરસેવો પણ કદાચ ચોખ્ખો જોઈ શકાય એટલા સુઘડ ડિસ્પ્લે સાથે તેના પહેલા ફોન કરતા ૭ ગણી ઝડપથી ફિલ્મ ઉતારી શકે તેવો હાઈડેફ મુવી કેમેરા (આ બાબતે આપણે એમને માપવા જઈએ એ કરતા એમની આ વાતને જ માપી લઈએ તો સારું)  

• દીકરીને પપ્પા સાથે….(ને લડવાનો મૂડ હોય તો જમાઈને સાસુ સાથે) સાવ દિલ ટુ દિલ (કે હોઠ થી હોટ) વાત કરાવી દેતું ફેસટાઈમ વિડીયો ફોન…અફલાતૂન!

• એક માત્ર ફોનનો બધો ડેટા આઈ-વાદળમાં ભરોવી દેતું i-cloud saving system. એટલે તમારો બધો ચિઠ્ઠો-હિસાબ એપલના આ વર્ચ્યુઅલ વાદળાં ખાતે જમા થઇ જાય. પછી તમે તમારું કોમ્પ્યુટર ખોલો કે આઈપેડ કે આઈ-બૂક…બધું ત્યાં જ હાજર…લ્યો જલસા કરો…(‘પેલી’ કે ‘પેલાં’ ની ડીટેઈલ્સ ખોવાઈ જવાની માથાકૂટ…ગૂલ)

• વર્ષો પહેલા બનેલાં ‘સુપર કોમ્પ્યુટર્સ’થી તો ક્યાંય ઝડપી હોય એવા પ્રોસેસર્સ. હવે એની કમાલ તમને ક્યાં જોવા મળે એ વિશે અલગ આ ખાસ છેલ્લો પોઈન્ટ…

• એ છે તેની સૌથી અસરકારક બાબત, જેનાથી વાતચીતની મતી મરાઈ ગઈ છે તેવી ઘટના એટલે તેમાં આવેલો ‘સિરી’ નામનો પ્રોગ્રામ. અત્યાર સુધીમાં આંગળીઓ દબાવી દબાવી મંડી પડતા સૌ ભૈ-બેનોને આ ‘સિરી’ એપ્લિકેશન બહુ વ્હાલી લાગી છે. દેશી ભાષામાં…પેલા વર્ષો જૂના જશુબા પણ મના કરે ત્યારે આ સસુરી ‘સિરી’ સાવ સીધી દોર થઇ ઘણાં જરૂરી કામો કરી આપે છે. તમે માત્ર હુકમો ઠોક્યે રાખો….એનું કામ એને ઝીલી લેવાનું. વેપારી કે ગર્લ-ફ્રેન્ડ સાથે એપોઈન્ટમેન્ટ ગોઠવણી ઉપરાંત….બૈરાની ભૂલાઈ ગયેલી વર્ષગાંઠ યાદ રાખવી, વ્હાલા બબલુની જોઈતી ચોકલેટ નજીકમાં ક્યાં મળી શકે એ બતાવવું, સવારે કે સાંજે ઊંઘમાંથી ઉભા કરવાનું, ગૂગલનું કોઈ પણ સર્ચ કમાંડ, આપણા શહેરનું તાપમાન જેવા કામો એના માટે ‘સાવ સામાન્ય’ છે….ને પાછા ઝડપી… (પણ કમબખ્ત ‘સિરીમતી’ના અંદરનું તાપમાન જાણવા એપલીયાઓ હજુયે મથી રહ્યાં છે!..)

આ બધી પ્રોસેસને ઉપાડવા એટલા માટે જ તેનો પ્રોસેસિંગ પાવરને અનેક ગણો વધારી દેવાયો છે. જે હોય તે..ખિસ્સા સાથે મગજને બહુ જોર ના પડે એ માટે માટેની તકેદારી તો આપણે જાતે જ રાખવી પડે છે..એટલે તમારી પાસે ખિસ્સાદમ હોય તો એક વાર ખર્ચો કરવા જેવો છે….

હવે આ એપલીયા પ્રોડક્ટપર આપણો દેશી બાપલ્યો ‘સિરી’ પર શું મેથી મારે છે… તે પણ જોઈ લ્યો…

 ‘સિરી‘ પંચ

આઈફોન પર ‘સિરી’ ના શ્રીગણેશ… ‘ઈંગ્લીસ’ માં…

આપના સ્નેહી કે દોસ્તને આ બ્લોગ વિશે જણાવવું હોય તો કોનું નામ આપી શકો?

એમનું નામ શું?(જરૂરી)

એમનો ઈ-મેઈલ?(જરૂરી)

જમા કરવું

Δ

ઇન્ટરનેટ આલમના તાજા-માજા સમાચારો…અપડેટ્સ !

તા. ૬ ઓગસ્ટ- ઈન્ટરનેટ તેની ૨૦ વર્ષની મદમસ્ત જવાનીમાં પ્રવેશી ગયું છે. અમેરિકાની DARPA સંસ્થાથી જન્મેલા આ ટેકનો-બાળકની સફરને ૩ વિકાસી ફેઝમાં મુકવામાં આવી છે. વેબ.૧.૦, વેબ ૨.૦ અને ૨૦૧૦થી વેબ ૩.૦ની ચક્ર-કથા જાણવા-માણવા જેવી છે. માત્ર માહિતીઓના દરિયાની મોજથી શરુ થયેલી આ સફરમાં પીન થી પ્લેનેટ સુધી ઓલમોસ્ટ બધી બાબતોના જ્ઞાનના મોજાં હવે પળેપળ ઉછળી રહ્યા છે.  કેમ ભીંજાવું, કેટલું ભીંજાવું તે આપના પગમાં છે. ગૂગલ આપણી પાસે છે. બોલો…ભોમિયા વિના જ ખેડવા નીકળવું છે?

HTML: ઈન્ટરનેટ  ૨૦ વર્ષની જવાની સાથે તેની કરોડરજ્જુ ગણાતી ભાષા HTML (Hyper Text Mark-up Language) પણ ૨૦ વર્ષની થઇ ચુકી. શરૂઆતમાં સીતા બનેલી આ ભાષાને ૧૯ વર્ષે ગીતાવતાર મળ્યો છે. એટલે કે તેની પાંચમી આવૃત્તિ HTML-5 બનીને આવી છે. નેટ-ખાટુંઓ (ટેકનોક્રેટ્સ), પ્રોગ્રામર્સના મતે આ અવતાર બધી ભાષાઓમાં સૌથી અસરકારક છે. મોબાઈલ હોય કે ડેસ્કટોપ કોમ્પ્યુટર…વેબ-જાળને હજુયે મજબૂત રીતે ગૂંથી લેવામાં HTML-5 આ વર્ષથી ‘બહુમાન’ મેળવે છે. દોસ્તો, તમને કે તમારા બાળકોને હજુયે ‘કોમ્પ્યુટર કરવું’ હોય તો બીજું બધું લેવાની આદતને બાજુ પર મુકીને આ ભાષા શીખી લેવાની મુર્તઝાચાર્ય ખાસ ભલામણ કરે છે.

તા. ૨૭મી જુલાઈ- જેનાથી આપણે કોમ્પ્યુટરની પા પા પગલી ભરવાનું શરુ કર્યું તે ઓપરેટીંગ સિસ્ટમ MS DOS ૩૦ વર્ષની થઇ ગઈ….કરોડો કોમ્પ્યુટર્સમાં ઘુસી લાંબો સમય રાજ કરતી માઈક્રોસોફ્ટની આ બબલીએ વિન્ડોઝ-૭ ના જમાનામાં પણ પોતાની ઠુંચૂક-ઠુંચૂક ચાલ બરકરાર રાખી છે. પોસિબલ છે કે વિન્ડોઝ-૮માં તેને રીટાયર્ડ કરી દેવામાં આવનાર છે. કેટલાંક ટેકનિકલ એક્સપર્ટના મતે અને માટે આ સિસ્ટમ હજુયે વ્હાલી છે.

પેટન્ટની ટંટાબાજી: “ઓ દાદાજી! આજથી હું તમારો દાદા છું!… ચાલો હવેથી મને પગે લાગજો.” –

આ હટકે વાક્ય સાચું ઠેરવાયુ છે. તારીખ અને વારની તો ખબર નથી પણ હમણાં જ જુલાઈના છેલ્લાં દિવસોમાં બંધ બારણે બની ગયેલી આ ઘટનામાં આવું વાક્ય બોલનાર છે: Google દીકરો અને સાંભળી લેનાર છે: IBM દાદા. વર્ષો જૂની પડી રહેલી IBM કંપનીની મહામૂલી ૧૦૩૦ ટેકનો-પેટન્ટ્સને ગૂગલે કરોડોમાં ખરીદી લીધી છે. (યાર! આ લોકો પાસે આટલાં ડોલરિયા આવે છે ક્યાંથી). જેમાં કોમ્પ્યુટરને લગતી બાબતો સાથે સાથે દિલ અને દિમાગને પકડી લે તેવી મોબાઈલી ખોજનો પણ સમાવેશ થયો છે. આપણે ધંધામાં દાદા બનીએ, માહિતીઓમાં મામા બનીએ કે કેરિયરમાં કાકા….પણ ગૂગલ-બાબાને નમવું પડશે….પાપાજી!

ઈ-ભૂખ: લોકોની વાંચન ભૂખને સંતોષવા ગયા સાલથી એમેઝોન.કોમે પ્રિન્ટેડ બૂક કરતા ઈ-બૂકનું ઉત્પાદન બમણું અને વેચાણ ચાર ગણું કરી લીધું છે. આંગળીને ટેરવે સેકન્ડ્સમાં કોઈક નોવેલ-ગાથા કે નવલકથા મેળવવી હોય….બાથરૂમમાં સ્નાન કરતી વખતે ઝબકારા મારતો આઈડિયા પકડી લેવો હોય યા વેપારી સંમેલનમાં સાવ નવું જ ક્વોટ સંભળાવવા માટે ત્વરિત ઈ-માહિતી મેળવવી હોય તો તેની ઈ-બૂક રીડર ‘કિન્ડલ’ હાથવગી બની રહી છે.

અબ કિસ મુહ સે બતાઉં?: ક્રિયેટિવ માહિતીઓના ટ્રેન્ડી રિપોર્ટની સામે એક બ્રિટીશ કંપનીએ આ ઇન્ડિયન મુર્તઝાને ઈજીપ્તમાં પેલી અમેરિકન એમઝોન કિન્ડલ ‘ફ્રી’ (મફત) મોકલવાનો પોઈન્ટ મુક્યો છે. પણ હાય રે કમબખ્તી…કેરોમાં એ મફત કિન્ડલને લાવતા ઘાટ કરતા ઘડામણ મોંઘુ પડે એવી વાત થઇ રહી છે………….ગ્લોબલી ફ્યુઝનની બાબતે કન્ફ્યુઝન તે આનું નામ!

ફ્રીકીંગ સમાચાર: ગુજરાતી બ્લોગ જગતમાં એક મીની-ત્સુનામી આવી રહ્યું છે. આથી જાહેર ગુજ-જનતાને જણાવવામાં આવે છે કે એની અસરથી નીડર બની એનો સામનો કરવા દિલ-દિમાગ કસી તૈયાર થઇ જાય. ડરવાની નહિં પણ ધરવાની આ વાત વિષે બસ થોડાં જ સમયમાં વધુ વિગતો આ જ બ્લોગ પર..   તો આપના દોસ્તો, પરિચિતોને તેનો લાભ આપવાનું ન ભૂલતા બંધુઓ! આ નીચેના ટચુકડા ફોર્મમાં તેમનું નામ અને ઈ-મેઈલ પણ મોકલાવશો તો પૂણ્ય થઇ જશે. સમાચાર સમાપ્ત થયા.

એમનું નામ શું?(જરૂરી)

એમનો ઈ-મેઈલ?(જરૂરી)

જમા કરવું

Δ

સર‘પંચ’

iPod New Magic in HQ-